هل تحتاج لقسم التسويق في حال تواجدك على مواقع التواصل الاجتماعي؟
من جدك؟ طبعا تحتاج.
اشتغلت مع شركات صغيرة ومتوسطة وأزعل لما أشوف شركات تتواصل مع وكالات دعاية وإعلان وما يكون عندهم عالأقل:
أهداف التسويقية
تقويم تسويقي وترويجي
استراتيجية تسويق وتواصل
لا لسة ما شفتوا شي، كمان ما يكون عندهم قسم تسويق!!!!! ونلاقي نفسنا بنتعامل مع قسم تقنية المعلومات أو المبيعات أو العمليات والتشغيل
وزي ما إنتوا عارفين وظيفة قسم تقنية المعلومات هو أن يكون مسؤول عن جميع البرمجيات التقنية و الأجهزة التقنية و الشبكات المعلوماتية وما يخصها من مشاريع داخلية وخارجية. بالإضافة، القسم لازم يتأكد أن جميع موارد الشركة محدثة تقنيا ومزودة بكل التقنيات اللازمة لأداء العمل على أكمل وجه.
أمّا بالنسبة للمبيعات فوظيفتهم تطوير خطة المبيعات وتنفيذها وبيع منتجات أو خدمات الشركة للفئة المستهدفة أو العملاء.
وأخيرًا، قسم العمليات والتشغيل يمون مسؤول عن الإنتاجية والكفاءة داخل الشركة و منتجاتها و خدماتها والتأكد أن الشركة تربح مقابل أقل التكاليف!
نجي للسؤال المهم..أي وحدة من دول ذكرت التسويق؟ هل شغلهم يحتم عليهم يعرفوا الفئة المستهدفة أو وضع السوق أو وضع المنافسين؟ اكيد لا! بس ما نقدر ننكر إنهم متميزين في أشغالهم اللي ماسكينها.
بس شغلة التسويق بسيطة صح؟
طبعا ياخي…بالضبط زي لو تروح لمصمم جرافيك تخليه يمسك الإدارة المالية للشركة…تخيل النتيجة ههههههههههههه
طيب خلّينا نتكلم بعقلانية التسويق الناجح و نرتب أفكارنا شوية..
أهم شي يعمله فريق التسويق هو إنه يروج للبراند وطبعا الفريق لازم يكون عارف أهمية هذا الدور.
فريق التسويق الفاهم هو اللي يقدر يوصل للفئة المستهدفة باحترافية و يقدر يبني رسالة البراند ومحتواه. للأسف صادفت شركات كثير هما نفسهم داخليا مو فاهمين البراند اللي شغالين عليه.
وعشان تنحل المشكلة لازم نبدأ بتعريف البراند و نبدأ نحط صورة لأفضل طريقة نوصل بها للفئة المستهدفة.
تاني شي لازم نكون “اپديتد”!
متابعة جديد السوق ومتابعة المنافسين تخليك عارف السوق كيف ماشي. المسوق المحترف يعرف يلقى فجوة في المنافسة ويخرج بفرص جديدة تخدم البراند. وطبعا وجود الفرص الجديدة يفرض عليك الابتكار عشان تغلب المنافس ويصير البراند حقك هو القدوة
و ايش شغلة الإدارة؟
إدارة التسويق هي المسؤولة عن خطة التسويق سواء طويلة الأجل او قصيرة الأجل لأن عمل الخطة راح يخليك تستحدث أهداف وتمشي على خطة لتحقيقها.
نجي للكلام الكبير…الميزانية.
التسويق مو ببلاش حتى لو كان في التواصل الاجتماعي. تحديد الميزانية مهم لتنفيذ خطة التسويق. طبعا تحديد الميزانية ما يكف! الموضوع يحتاج تحديد العائد الاستثماري من ميزانية التسويق. هل هو مبيعات؟ زيادة الوعي؟ لازم يتحدد والا الإدارة العليا ما راح تعطي ميزانية.
ولمّن نجي على أرض الواقع.. ايش العمل؟
خلال تطبيق خطة التسويق, فريق التسويق مسؤول عن الانشطة التسويقية والترويجية للبراند سواء تطبيقها في قنوات التسويق أو تصاميم الحملات أو عمل وإخراج المحتوى التسويقي لقنوات التسويق.
وصلنا للمحتوى!
بما إني بتكلم عن التواصل الاجتماعي، فأهم شي فيها هو عمل المحتوى. والمحتوى لازم يكون تحت قيادة إدارة التسويق لأنه إذا إدارة ثانية قادت المحتوى ما راح يكون عندهم الخبرة في استهداف العملاء وتحديدهم وعمل المحتوى والموافقة عليه.
انتهت مهام فريق التسويق؟ لا لسّة!
البحث التسويقي كمان هو من مهام إدارة التسويق ولازم الأبحاث تكون بشكل مستمر حتى إذا طرف ثالث هو المسؤول عن الابحاث
غير كدا؟
طبعا أغلب الشركات تتعامل مع شركات دعاية وإعلان ومقدمين خدمات ثانية تساعد في تنفيذ خطة التسويق. إدارة التسويق هي المسؤولة عن إدارة مقدمين الخدمات لأنهم هم الوحيدين اللي عارفين كيف لازم المحتوى يخرج وراح يوصل لمين وهل المحتوى يليق بالعميل و البراند.
عرفنا وظيفة فريق التسويق؟؟ ممتاز
الآن نرجع للي قلته في أول المقال. هل تحتاج تسويق على التواصل الاجتماعي ولا لا؟ إذا خطة التسويق تخلي الإدارة تراقب مستوى الأداء وتدير الأنشطة التسويقية للبراند وإذا نقدر نحول خطة التسويق إلى خطة تسويق في التواصل الاجتماعي فتوكلنا على الله.
اكتبوا لي في التعليقات المشاكل التسويقية اللي عانيتو منها وكيف حليتوها
